同一屋檐下  港版同一屋檐下

江口洋介、福山雅治同酒井法子主演嘅《同一屋簷下》，今年喺該劇播出25周年紀念，蕭定一旗下hmv數碼中國買咗香港版權，拍攝港版《同》劇。大家嘅焦點自然集中係柏木六兄弟姊妹身上，日版大哥「達也」由江口洋介飾演、跟住順序係二佬「雅也」福山雅治、三妹「小雪」酒井法子、四佬「和也」石田壹成、五妹「小梅」大路惠美，細細佬「文也」由山本耕史飾演。至於香港版，阿一屬意由旗下藝人演出，據知張智霖飾演「達也」、周柏豪演「雅也」、連詩雅演「小雪」、張建聲係「和也」、「小梅」係沈月萍、「文也」就會係蔡翰億（BabyJohn），而胡杏兒有機會演張智霖嘅未婚妻，周秀娜飾演內田有紀角色，演一名有心臟病嘅演員，同柏豪有唔少戲份。　　港版故仔會同原著一樣，圍繞幾兄弟姊妹情，主要情節好似大佬、二佬同養女小雪嘅三角戀都會出現。不過由於係港版，同埋25年後再開拍嘅關係，社會亦出現好多變化，日常生活多咗手機同apps所以角色、環境都會調整。　　套劇預計秋天開拍，初步拍攝22集，由之前《選戰》導演黃國輝負責，暫定下年播出。阿一方面就回應話：「《同一屋簷下》係一套好經典嘅日劇，亦係好多香港人嘅集體回憶，我哋係買咗版權會拍港版，故事情節會盡量保留，但角色同環境係加入o依家時代嘅氣息，而喺25周年、四份一世紀後再拍番亦好意義。」